𝗘𝗡𝗚𝗟𝗔𝗡𝗗-𝗜𝗡 𝗔𝗟𝗕𝗔𝗡𝗜𝗔 𝗔𝗡 𝗦𝗔𝗪𝗣, 𝗪𝗢𝗥𝗟𝗗 𝗖𝗨𝗣 𝗔𝗡 𝗛𝗡𝗔𝗜𝗛

November 15, 2021 (Monday): Kar hmasa Zirtawp zan khan England chuan Wembley-ah Albania an lo mikhual a, 5-0 ngawtin an lo sawp, 2022 World Cup, Qatar-a khelh turin point khat chiah an mamawh tawh.

He inkhelah hian England captain Harry Kane chuan goal thum thunin hat-trick a siam a, England tan a rawn thawh hlawk hle.

Group I-ah hian England hi an chak chho viau a, amaherawhchu, tun hnai an qualifier vawi hnihah draw result ve ve an neih avangin an dinhmun a chiang lo leh deuh a ni. Ram tan tun hnaia che ṭha thei lo Kane a rawn harh thar thut a, England tana goal khung tam lamah 4-na rawn ni chhovin an ram football team chu Qatar zin thei tura dinhmun ṭha takah a rawn hlangkai leh a ni.

England tan hian Manchester United captain Harry Maguire chuan minute 9-naah goal hmahruai a rawn khung phawt a, ani bakah Liverpool captain Jordan Henderson pawhin goal khat a rawn khung bawk a ni.

Albania laka hat-trick siamtu Kane hian England tan goal 44 a khung tling ta a, Tottenham Hotspur striker hian England tana goal khung tam lamah Spurs player ropui Jimmy Greaves a rawn nihrual ta chiah bawk. Greaves hi kumin September thla khan mual a liam tawh a ni.

England hian match khat khelh tur an la nei a, point 23 an hmu tawh. Hetih lai hian Group I-a anmahni hnaih bertu Poland chuan point 20 an hmu tawh thung a, thil awmdanin a zir loh chuan chhiarkawp danin England hi pahnihna la ni ve thei chu an ni. Poland hi chakin, an chakna a san deuh viau laia England hi an chak loh chuan an group-ah pahnihna an la ni ve thei a, Poland hian an tlin khalh daih thei. Mahse, tun dinhmunah chuan England hi goal difference-ah an sang zawk a, thil mak a thlen a rinawm chiah loh. Bakah, England-in an khelh leh tur hmabak hi football ram lian lo tak San Marino an ni a, England hian an hneh ngei a rinawm a, an draw pawhin an tlang tawh tho a ni.

 

- Kolasib Aw